ઝીણા ઝરમર વરસે મેહ,
ભીંજે મારી ચૂંદલડી:
એવો નીતરે કૌમારનો નેહ,
ભીંજે મારી ચૂંદલડી.
આજે ઝમે ને ઝરે ચન્દ્રીની ચન્દ્રિકા,
ભીંજે રસિક કોઈ બાલા રે;
ભીંજે સખી ભીંજે શરદ અલબેલડી,
ભીંજે મારા હૈયાની માળા;
હો ! ભીંજે મારી ચૂંદલડી.
વનમાં પપૈયો પેલો પિયુ પિયુ બોલે ,
ટહુકે મયૂર કેરી વીણા રે ;
ટમ ટમ ટમ ટમ વાદળી ટમકે ,
ટમકે મારા નાથનાં નેણાં ;
હો ! ભીંજે મારી ચૂંદલડી.
આનન્દકન્દ ડોલે સુંદરીના વૃંદ, ને
મીઠા મૃદંગ પડછન્દા રે:
મંદ મંદ હેરે મીટડી મયંકની
હેરો મારા મધુરસ ચંદા !
હે ! ભીંજે મારી ચૂંદલડી.
– ન્હાનાલાલ
Filed under: ન્હાનાલાલ | Tagged: આજે, એવો, કૌમારનો, ચન્દ્રિકા, ઝમે, ઝરમર, ઝરે, ઝીણા, નીતરે, નેહ, ન્હાનાલાલ, ભીંજે મારી ચૂંદલડી, મેહ, વરસે | 1 Comment »