બ’ઈ આ ભમરાને ક્યમ કાઢું ?!
જરી ન જાતો આઘો હું તો ઘણીયે નીર ઉડાડું !
પલક અહીંથી, પલક તહીંથી
લળે વીંઝતો પાંખ્યુ,
બે કરથી આ કહો કેટલું
અંગ રહે જી ઢાંક્યું ?!
જાઉં ગળાબૂડ જળમાં તોયે મુખ તો રહે ઉઘાડું !
બ’ઈ આ ભમરાને ક્યમ કાઢું ?!
મેલી મનહર ફૂલ પદમનાં
પણે ખીલ્યાં કૈં રાતાં,
શું ય બળ્યું દીઠું મુજમાં કે
આમ લીયે અહીં આંટા ?!
ફટ ભૂંડા ! હું છળી મરું ને તમી હસો ફરી આડું !
બ’ઈ આ ભમરાને ક્યમ કાઢું ?!
– પ્રદ્યુમ્ન તન્ના
Filed under: પ્રદ્યુમ્ન તન્ના | 2 Comments »